578
Rəylər 13 iyun — 13:40

Ruslan Xasbulatov: “Əsl zərbəni Azərbaycana qarşı müharibəni başlamış Ermənistan endirdi”

“Bizdə bir şeyi anlamaq istəmirlər: Sovet İttifaqına əsl ölümcül zərbəni Azərbaycana qarşı müharibəni başlamış Ermənistan vurdu”. Bunu “Delovaya qazeta Tatarstana” nəşrinə müsahibəsində RSFSR Ali Sovetinin keçmiş başçısı professor Ruslan Xasbulatov deyib.

Dünən Rusiyada 12 iyun – Rusiya günü qeyd edilib. 1990-cı ildə həmin gün RSFSR-in dövlət müstəqilliyi haqqında bəyannamə qəbul edilib. Bir çoxları düşünür ki. məhz bu sənədin qəbulu SSRİ-nin dağılmasının əsas səbəbi olub. Lakin Ruslan Xasbulatov bununla qəti razı deyil.

“Bəyannamə o dövrün bütün siyasəti kontekstində hazırlanmışdı. Lakin onun təbliğat effekti məzmunundan daha güclü oldu. İctimai fikirdə bu, Rusiyanın ölkənin yerdə qalan hissəsindən qopmaq istəyi kimi qarşılandı. Hər yerdə müstəqilliklərini elan etməyə başladılar. Ətalət qüvvəsi ilə bu, muxtariyyətlərə və vilayətlərə qədər gedib çıxdı”, - o bildirib.

SSRİ-nin dağılmasının Baltikyanı ölkələrin uzaqlaşması ilə bağlı olması sualına cavab olaraq professor Xasbulatov deyib ki. hadisələr başqa məcrada cərəyan edirdi:

“O vaxt Baltikyanı ölkələr hələ uzaqlaşmamışdı. Əsl uzaqlaşma erməni hadisələrindən sonra başladı. Təəssüf ki, bizdə bir şeyi anlamaq istəmirlər: Sovet İttifaqına əsl ölümcül zərbəni ən azı bu cür – silahlı qarşıdurma şəklində iddia edə bilməyəcəyi Dağlıq Qarabağ uğrunda Azərbaycana qarşı müharibəni başlamış Ermənistan vurdu. Zaqafqaziya cəbhəsi dağıldı: əksəriyyət Ermənistanın tərəfinə keçdi, digərləri Azərbaycanı dəstəklədilər. Belə bir vəziyyətdə ittifaq rəhbərliyi münaqişə tərəflərinə qarşı dözülməz dərəcədə səbrlə yanaşdı - əslində isə sərt şəkildə qayda-qanun yaratmaq lazım idi. Çox sərt – odlu silahlardan istifadə etməklə”.

Xasbulatovun sözlərinə görə, Qarabağ münaqişəsindən sonra sülh bərqərar olmadı.

“Əksinə, bu hadisələrdən sonra Baltikyanı ölkələr anladılar ki, Moskvaya elə də boylanmadan hərəkət etmək olar. O vaxta qədər Baltikyanı ölkələrin siyasətçiləri və fəalları özlərini necə aparırdılar? Xatırlayırsınızsa, ümumittifaq qurultayında onların rəhbərləri qışqırırdılar: “Bizə iqtisadi islahatlar verin! Öz imkanlarımızı isə özümüz də bilirik!” Başqa sözlə. heç bir siyasi məqsəddən söhbət getmirdi. Bircə söz də yox idi! Lakin ermənilər Qafqazda vəziyyəti partlatdıqdan sonra Baltikyanı ölkələrdəki siyasətçilər fikirləşdilər ki, Qorbaçov boş adamdır, zəifdir, bizə heç nə edə bilməz. Bax, hər şey buradan başladı! Sonra Zviad Qamsaxurdia gəldi, Tbilisi hadisələri baş verdi”, - o qeyd edib.

Xəbərlər