2050
Dünən 7 yanvar — 12:54

Tovuzda iki aydır itkin düşmüş 10 yaşlı qızı hansı manyak öldürdü...

Xəbər verdiyimiz kimi, Tovuz rayonunun Dondar Quşçu kəndində iki ay əvvəl itkin düşən azyaşlı Nərmin Quliyevanın yanmış meyiti onun yaşadığı evinin qarşısına atılıb. Hazırda hadisə yerində olan 10 yaşlı Nərminin atası Şərif Quliyev baş verənlərə hələ də inanmadığını bildirib: “Hazırda hadisə yerindəyik. Bakıdan ekspert qrupunun gəlişini gözləyirik. Bütün polis əməkdaşları, rəis, İcra Hakimiyyətinin nümayəndələri, kənd camaatı hadisə yerindədir. Heç meyiti yerindən tərpətməmişik. Baxdıq üstündəki paltarları yanıb. Daha detallı araşdırmadan sonra öyrənəcəyik nə baş verib”.

Ş.Quliyev qeyd edib ki, qohum-qonşuda şübhələndiyi kimsə yoxdur: “Biz kiminləsə ədavəti olan adam deyilik. Öz halımızda, güzəranımızda yaşayan adamlarıq. Hadisə qardaşımın uşağının toyundan bir gün sonra-21 noyabrda olub. Gödəkçəm qardaşımgildə qalmışdı. Özüm qızımı göndərdim ki, getsin mənim gödəkçəmi gətirsin. Gödəkçəni evdən götürüb küçəyə çıxandan sonra da yoxa çıxıb. Mən bu işin axırına kimi gedəcəm. Necə olur olsun, qızıma qarşı törədilmiş cinayətin aşkara çıxması üçün əlimdən gələni edəcəm. Mətbuat nümayəndələrindən bu işə diqqət yetirmələrini xahiş edirəm”.

Xatırladaq ki, 2019-cu ilin noyabrın 21-də itkin düşən Tovuz rayon sakini, 2010-cu il təvəllüdlü Nərmin Şərif qızı Quliyevanın meyti Dondar Quşçu kənd ərazisindəki boş sahədə yandırılmış halda aşkarlanıb. Hadisənin kim tərəfindən törədildiyi hələ ki, məlum deyil.

Faktla bağlı Tovuz rayon Prokurorluğundan Cinayət Məcəlləsinin müvafiq maddələri ilə cinayət işi açılıb, araşdırma aparılır. (Modern.az)

*  *   *10:41

Ötən il noyabrın 20-də Tovuzda itkin düşən azyaşlı qızın yanmış meyiti tapılıb.  Xəbərlərə görə 2010-cu il təvəllüdlü Nərmin Şərif qızı Quliyevanın meyiti ötən gün yanvarın 6-da axşam saatlarında Dondar Quşçu kəndi ərazisində yanmış vəziyyətdə tapılıb. Hadisənin təfərrüatı barədə hələ ki, məlumat yoxdur. 

Baş prokurorluğun bu dəhşətli cinayətlə bağlı yaydığı rəsmi məlumatda deyilir ki, Tovuz rayonunun Dondar Quşçu kəndində anadan olmuş 2010-cu il təvəllüdlü Quliyeva Nərmin Şərif qızının 21 noyabr 2019-cu il tarixdə itkin düşməsi ilə əlaqədar aparılmış araşdırmalarla onun qəsdən öldürülməsinə “kifayət qədər əsaslar müəyyən edildiyindən”  Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə) maddəsi ilə cinayət işi başlanıb.

Yanvarın 6-da azyaşlının Dondar Quşçu kəndi ərazisində azyaşlının yanmış meyitinin aşkar olunması ilə əlaqədar dərhal Daxili İşlər Nazirliyinin, Baş Prokurorluğun, Ədliyyə Nazirliyinin Məhkəmə Ekspertizası Mərkəzinin və Səhiyyə Nazirliyinin Məhkəmə-Tibbi Ekspertiza və Patoloji Anatomiya Elmi-Təcrübi və Tədris Birliyinin təcrübəli əməkdaşları Tovuz rayonuna ezam olunublar. Hazırda iş üzrə cinayəti törətmiş şəxs və ya şəxslərin müəyyən edilməsi istiqamətində zəruri və təxirəsalınmaz istintaq-əməliyyat tədbirləri davam etdirilir.

Sosial şəbəkələrdə hadisə ilə bağlı azyaşlı qızın əmisi və əmisi oğlanlarının saxlanılması ilə bağlı məlumatlar yayılıb. Lakin Dondar Quşçu bələdiyyəsindən virtualaz.org-a hadisə ilə bağlı yaxın qohumlarının saxlanılmadığını, yanlış məlumatlar yayıldığını deyiblər: “Dünən bütün kənd hadisə yerində idi. Saxlanılan olsaydı kənddə xəbər yayılardı”, -bələdiyyənin adının açıqlanmasını istəməyən əməkdaşı söyləyib.

Kənd sakinləri isə deyiblər ki, mərhumun ailəsinin maddi imkanları yaxşı olmayıb: “Atası Şərif Quliyev fəhləliklə iki qız övladı böyüdürdü, kasıb, heç kimlə ədavəti olmayan ailədir. Nərminin özündən böyük bacısı qaldı. Bütün kənd qızın axtarışlarına qoşulmuşdu”, -sakinlərdən biri danışıb. Bildirib ki, Nərmin itkin düşən gün atası ilə toya gedib. “Şərifgil 4-5 qardaşdılar, hər birinin ayrıca evi var. Noyanbrın 21-də qardaşının uşağının toyunda olublar, atası gödəkçəsinin götürməsi üçün Nərmini əmisigilə göndərib. Qız onlardan çıxandan sonra itkin düşüb”.

Kənd sakinləri əlavə ediblər ki, əmisi oğlanlarından biri əqli qüsurludur. Uşaq da məhz əmisigilə gedəndən sonra yoxa çıxdığından şübhələr yaranıb.

Ü.Xudiyeva

Virtualaz.org

Xəbərlər