339
Cəmiyyət 23 may — 17:03

Azərbaycan məscidlərində bayram namazı qılınmayacaq

Daha əvvəl xəbər verildiyi ki, Ramazan bayramı Şəvval ayının 1-i – Ayın üfüqi ərazimizdə görünməsindən asılı olaraq may ayının 24-nə təsadüf edəcək.

Virtualaz.org Qafqaz Müsəlmanları İdarəsinə (QMİ) istinadən bildirir ki, bu il ölkəmizdə karantin rejiminin müddətinə dair Azərbaycan hökumətinin verdiyi qərara əsasən bayram namazı məscidlərdə qılınmayacaq: "Ramazan ayına dair QMİ Qazılar Şurasının fətvasında fitrə zəkatına dair tövsiyələr əksini tapıb. Bir daha xatırladırıq ki, orucun mühüm əməllərindən biri olan fitrə zəkatının vaxtı Ramazan ayının son günüdür.

Bu günə uyğun olaraq adambaşına 5-10 manat arası fitrə zəkatının verilməsi məsləhət görülür. Fitrə canın sədəqəsidir və hər bir imkanı olan müsəlmanın ailəsinin hər bir üzvü üçün fitrə zəkatı çıxararaq imkansızlara, ehtiyacı olan ailələrə verməsi vacibdir.

Fətvada qeyd olunan bütün müddəalar Ramazan ayının sonuna kimi qüvvədədir".

Qeyd edək ki, aprelin 20-də Qafqaz Müsəlmanları İdarəsinin (QMİ) Qazilar Şurasının Ramazan ayının başlanması ilə bağlı fətvasında deyilirdi ki, xüsusi karantin dövrünün tələblərinə uyğun olaraq məscid və ziyarətgahlarda ibadətlərin müvəqqəti dayandırılması barədə zəruri qərar verilib:

"Biz, din xadimləri mövcud xəstəliyin təmas, ünsiyyət vasitəsilə yoluxmasını nəzərə alaraq, bütün məhdudlaşdırıcı tədbirləri dəstəkləyirik. Xüsusi karantin rejimi dövründə şəriətdə vacib olmayan, adət-ənənələrimizə söykənən dini mərasimlərin (ehsan, mövlud və s.) keçirilməməsini tövsiyə edirik. Şəri baxımdan vacib olan dəfn mərasimləri şəriət qaydalarına əməl edilməsi şərtilə karantin dövründə məhdud çərçivədə həyata keçirilməlidir. İftar süfrəsinin də hər bir evdə yalnız ailə üzvlərinin iştirakı ilə açılmasına çağırırıq. Bildiririk ki, bütün bu tövsiyələr hazırda tüğyan edən xəstəlik səbəbindən müvəqqəti səciyyə daşıyır".

Qafqaz Müsəlmanları İdarəsinin sədr müavini Fuad Nurullayev də jurnalistlərə deyib ki, hazırda koronavirus infeksiyasının yayılması davam edir və Nazirlər Kabineti yanında Operativ Qərargahın qərarına görə, insanlar kütləvi olaraq bir yerə yığışa bilməz:

“Biz də bu qərara hörmət edirik. Virusun yayılmaması, insanların yoluxmaması üçün əlimizdən gələni etməliyik. Məscidlərdə insanların bir yerə yığılması da təhlükə yarada bilər. Bunun qarşısını almaq üçün Qafqaz Müsəlmanları İdarəsinin rəhbərliyi və Qazılar Şurası qərar verib ki, müvəqqəti olaraq məscidlərdə cümə, camaat, bayram namazları təxirə salınsın. Karantin rejimi davam edir. Ona görə də insanlar bayram namazlarını öz evlərində fərdi olaraq qıla bilərlər. İnşallah, gələn il yenidən bayram namazlarını məscidlərdə camaatla birgə qılarıq”.

Xəbərlər