7287
Bu gün 28 yanvar — 14:52

Məhərrəm Əliyevin qohumunun işi üzrə məhkəmə gedir

Bu dəqiqələrdə Bakı Apellyasiya Məhkəməsində hakim Əmir Bayramovun sədrliyi ilə general Məhərrəm Əliyevin qohumu (bacısı nəvəsi), Bakının Tiflis prospektindəki “Azpetrol” yanacaqdoldurma məntəqəsində quldurluq və xuliqanlıq əməli törədən İsa Əzizovun işi üzrə məhkəmə prosesi keçirilir.

Əməkdaşlarımız İnarə Rafiqqızı və Ramella İbrahimxəlilova məhkəmədən xəbər verir ki, proses qapalı keçirilir, jurnalistlərin içəri keçməsinə icazə verilməyib.

Xəbər verildiyi kimi İsa Əzizovun və həmin cinayətə görə saxlanılan Mahir İsgəndərovun barəsində Nəsimi rayon məhkəməsi 30 günlük inzibati həbs qərarı çıxarıb. Lakin Əzizov və İsgəndərov bu qərardan apelyasiya şikayəti veriblər. Əslində isə inzibati həbs qərarı da icra olunmayıb və generalın qohumunun Meksikaya qaçdığını göstərən fotodəlil var.

Müxbirimiz xəbər verir ki, məhkəmədən İsa Əzizovla Mahir İsgəndərovun prosesə qatılıb-qatılmadıqları barədə heç bir informasiya vermirlər. Bundan əvvəl Nəsimi rayon polis idarəsi İsa Əzizovun azadlığa buraxıldığını təsdiqləmişdi. Baş prokurorluq isə sorğumuza cavab olaraq bildirib ki, bu vəziyyəti araşdırır və əlavə informasiyalar veriləcək.

Beləliklə, situasiya olduqca qaranlıq və anlaşılmazdır: general Məhərrəm Əliyevin qohumu haradadır-müttəhimlər kürsüsündə, yoxsa Meksikada?

*  *   *12:26

Bakının Tiflis prospektində “Azpetrol” yanacaqdoldurma məntəqəsinin işçilərini döyən və onlara silah çəkən idmançı İsa Əzizov ötən gecə Meksikaya qaçıb.

Virtualaz.org müsavat.com-a istinadən xəbər verir ki, bu fakt  polisin azadlığa buraxdığı İsa Əzizovun yaxın qohumu Orxan Əzizovun Facebook sosial şəbəkəsində paylaşdığı fotodan məlum olur. 

Fotodan  görünür ki, İsa Əzizov təxminən 10 saat öncə Mexikonun beynəlxalq aeroportunda təyyarədən enib, onu O.Əzizov qarşılayıb və onlar birlikdə Venustiano Karranza şəhərinə gediblər.  Şəkildə sükan arxasında oturan şəxsin İsa Əzizov olmasına şübhə yoxdur. Fotonun çəkildikdən dərhal sonra, elə aeroportdaca sosial şəbəkəyə yükləndiyi anlaşılır.

Bundan əvvəl APA iddia etmişdi ki, Nəsimi rayon məhkəməsi İsa Əzizovun və onunla birlikdə saxlanılan Mahir İsgəndərovun barəsində 30 sutkalıq inzibati həbs qərarı çıxarıb. Təqsirləndirilənlər isə apelyasiya şikayəti verib. Lakin virtualaz.org hüquq-mühafizə orqanlarından dəqiqləşdirib ki, İsa Əzizov saxlanılandan cəmi bir neçə saat sonra polisdən buraxılıb və onun ötən gecə Bakını tərk etməsi təşkil olunub. Belə görünür ki, İsa Əzizovun növbəti bespredeli ətrafında yaranan böyük ictimai rezonansla bağlı olun bir müddət ölkədən kənarda olması məsləhət bilinib.

*     *   *12:04

APA xəbər verir ki, Bakıda yanacaqdoldurma məntəqəsinin mühafizəçisini döyən idmançılar inzibati qaydada cəzalandırılıblar.

Məlumata əsasən Nəsimi rayon Məhkəməsində hakim Elman İsayevin sədrliyi ilə keçirilən prosesdə İsa Əzizovun və Mahir İsgəndərovun barələrində 30 sutka inzibati həbs qərarı çıxarılıb. Təqsirləndirilən şəxslər məhkəmə qərarından apellyasiya şikayəti veriblər.

Mənbəmiz isə bildirir ki, İsa Əzizov və Mahir İsgəndərovun barəsində çıxarılan inzibati həbs qərarı apellyasiya şikayəti əsas götürülərək icra edilməyib və generalın Bakının mərkəzində bespredel  törədən yaxın qohumu hazırda azadlıqdadır.

*   *   *11:27

Yanvarın 26-da gecə Bakının Tiflis prospektində yerləşən “Azpetrol” yanacaqdoldurma məntəqəsinin mühafizəçisini döyən idmançılar azad edilib.

Bu barədə virtualaz.org saytına Nəsimi rayon polis idarəsindəki mənbələrdən bildirblər.

Mənbə deyib ki, yanacaqdoldurma məntəqəsində törədilən xuliqanlığa görə saxlanılmış İsa Əzizov və Mahir İsgəndərov iki sutka saxlanıldıqdan sonra onların barəsində cinayət işi qaldırılmadığından azadlığa buraxılıblar. Polisin səlahiyyətinə görə saxlanılan şəxs barəsində cinayət işi qaldırılmasa ən çoxu iki sutka saxlanıla bilər.

Xatırladaq ki, “Bentley” avtomobilində yanacaqdoldurma məntəqəsinə daxil olan İsa Əzizov və daha üç nəfər (ikisi qız olmaqla) əvvəlcə məntəqənin operatorunu döyüb. Daha sonra mühafizəçi Sadiq Bağırorovu döyərək ona ağır bədən xəsarətləri yetirib. Ardınca onların daha bir neçə dostu “Prado” markalı avtomobillə YDM-ə gələrək işçiləri döyüb təhqir ediblər. İsa Əzizov habelə maşından silah çəkərək YDM-in işçilərini hədələyib, “hamınızı güllələyib pulda basdıraram” deyib.

Xəbər verildiyi kimi İsa Əzizov prezidentin müdafiə məsələləri üzrə köməkçisi xidmətinin müdafiə məsələləri şöbəsinin rəhbəri, Bakı polisinin keçmiş rəisi general Məhərrəm Əliyevin qohumudur. Ötən ilin mayında Bakıda “Famous” karake-barında iki qızı da döyən İsa Əzizovla qohumluq əlaqələrinin olduğunu generalın qardaşı, deputat Adil Əliyev də təsdiq edib. Lakin o, İsa Əzizovla “uzaq qohum olduqlarını” bildirmişdi.

Lakin virtualaz.org dəqiqləşdirib ki, İsa Əzizov Məhərrəm Əliyevlə heç də uzaq qohum deyil. Onun atası Nadir Əzizov Bakının “8-ci kilometr” massivindəki “Ramal” ticarət mərkəzinin sahibidir, Məhərrəm Əliyevin doğma bacısı oğludur və keçmiş sahə müvəkkilidir. Başqa sözlə, Bakıda qoçuluq edən və “hamını güllələyib pulda basdıracağı” ilə hədələyən qoçu generalın doğmaca bacısı nəvəsidir.

Mənbələr bildirir ki, Nadir Əzizov bir müddət dayısının Pirşağıdakı malikanəsini alıb və oğlu orada nadir quşlar saxlayır.

Göründüyü kimi generalın yaxın qohumu növbəti dəfə Bakıda cinayət məcəlləsinin bir neçə maddəsi ilə tövsif edilən əməl törətsə də bu dəfə də onun barəsində cinayət işi qaldırılmayıb və azadlığa buraxılıb. Generalın ərköyün qohumunun bu əməli prezident İlham Əliyevin özbaşınalıq edən məmurlara və yaxınlarına növbəti sərt xəbərdarlığı ilə eyni vaxtda baş vermişdi.

Virtualaz.org

Xəbərlər