499
Bu gün 4 iyul — 19:42

“Mirvari Park” özünü 17-ci mərtəbədən atmaq istəyən sakin barədə açıqlama verib

“Mirvari Park” yaşayış kompleksinin rəhbərliyi dünən bir sakinin kompleksdəki evlərdən birinin eyvanına çıxaraq 17-ci mərtəbədən özünü atmaqla intihar etməyə cəhd göstərməsini əks etdirən video görüntüyə münasibət bildirib.

Şəxsin belə bir addım atmasına səbəb onun avtomobilinin kompleksin qarajına buraxılmaması səbəb olmuşdur. Sonradan həmin şəxsi belə bir dəhşətli hadisəni törətməkdən çəkindirmək mümkün olmuşdur.

“Mirvari Park”-dan bildirdilər ki, kompleksin yeraltı qarajında mövcud olan parklama yerləri 1 iyuldan etibarən satışa çıxarılıb. “Sakinlərə bu barədə üç ay əvvəldən məlumat verilmişdi. Eyvandan özünü atmaq istəyən şəxs dünən sərxoş vəziyyətdə qaraja daxil olmaq istəmiş, lakin o müvafiq yer almadığına görə qaraj sahəsinə buraxılmamışdır. Buna görə o özünü 17-ci mərtəbədən atacağı ilə bağlı bizə hədə-qorxu gəlməyə başladı və kompeksin rəhbərliyinin hadisə yerinə gəlməsini tələb etdi.

Hadisə yerinə gələn FHN əməkdaşları bu şəxsin nə istədiyini öyrənməyə çalışanda məlum oldu ki, o, daha 15 gün qaraj sahəsində park etməyə icazə verilməsini istəyir. Biz də ona bu şəraiti yaratdıq. Məgər belə bir şou təşkil etməyə dəyərdimi?

Bir daha vurğulamaq istəyirik ki, bu adam sərxoş vəziyyətdə idi. Çağırışa gələn müxtəlif dövlət qurumlarının əməkdaşları da bütün bunları qeyd etdi. Polis ona saxta zəng üçün protokol yazdı.

Dayanacaq yerləri məsələsinə gəlincə, kompleksimizdə mövcud olan qarajlar yeddi ildir ki sakinlərə icarəyə verilirdi. Daha sonra parklama sahələrinin nağd və ya kreditlə satışa çıxarılması qərara alındı. “Mirvari Park”-dakı yeraltı dayanacaq iki mərtəbədən ibarətdir. 1-ci mərhələdə üst mərtəbədəki park sahələrini satırıq və yerlərin yarısı artıq satılıb. Bu şəxs heç bir yer almaq istəmir və belə bir əsassız ssenariyə əl atmaq qərarına gəlib”, kompleksin açıqlamasında deyilir.

Xəbərlər