1285
Bu gün 7 dekabr — 18:40

Qazaxıstan çöllərində donma təhlükəsi ilə üzləşənlər Azərbaycan yox, Dağıstan idmançılarıdır

Azərbaycanın Qazaxıstandakı səfirliyi öz araşdırmasını apardıqdan sonra açıqlama verib.

Virtualaz.org xəbər verir ki, Qazaxıstan mediasının səhv etdiyi məlum olub. Qazaxıstanın çöllərindəki yolda azərbaycanlı cüdoçular yox, Dağıstan güləşçiləri donublar.

Səfirliyin mətbuat xidmətindən haqqin.az-a verilən məlumata görə, Qazaxıstanın Atrau şəhərində 2006-2008-ci il təvəllüdlü gənclər arasında keçirilən sərbəst güləş üzrə beynəlxalq turnirdə Azərbaycan idmançılarının iştirakı barədə məlumat həqiqətə uyğun deyil. Beynəlxalq yarışda iştirak edən və yolda çətin vəziyyətdə olan komanda Rusiya sərbəst güləşçilərindən ibarətdir. İlkin məlumata görə, onlar Rusiya Federasiyası Dağıstan Respublikasının Dərbənd şəhərinin sakinləridir.

*   *   *09:38

Azərbaycanın yeniyetmələrdən ibarət cüdo komandası Qazaxıstan çöllərində donma təhlükəsi keçirib.

Virtualaz.org Qazaxıstan KİV-lərinə istinadən xəbər verir ki, ötən gün dekabrın 6-da gecə saatlarında Atırau vilayətində polis Atırau-Həştərxan avtomobil yolunda xarab olub qalmış “Mercedes Sprinter” mikroavtobusu aşkar edib.

Polis aşkar edib ki, avtobusun salonunda 16 məktəbli və onları müşaiyət edən üç yetkin şəxs var, onlar soyuqdan donma təhlükəsi ilə üzləşiblər. Məlum olub ki, mikroavtobus Azərbaycanın cüdo üzrə yeniyetmələrdən ibarət komandasını Atırau vilayətinə, beynəlxalq yarışa aparırmış.

“Patrul ekipajı operativ şəkildə uşaqları rayon polis bölməsinə aparıb. Qonaqlara isti yemək və çay veriblər. Bir müddət sonra polis departamenti rayon icra hakimiyyəti ilə birlikdə uşaqların başqa avtobusla vilayət mərkəzinə aparılmasını təşkil edib. Polislər uşaqları Atırau şəhərinə qədər müşaiyət ediblər”,-regional polis idarəsinin açıqlamasında deyilir.

Bildirilir ki, Bakıdan olan gənc cüdoçular dekabrın 10-a qədər Atırauda qalacaqlar. “Onlar sadəcə olaraq donub ölə bilərdilər, çünki avtobus xeyli vatdır şaxtada dayanmışdı”,-polis departamentindən bildiriblər.

Departamentdən əlavə ediblər ki, yarışlar başa çatana qədər Azərbaycan yığmasının mikroavtobusu təmir ediləcək və onlar komandanı hökmən yolda müşaiyət edəcəklər.

Mikroavtobusun sürücüsü Murad Səfiyev xilas olduqları üçün Atırau polisinə minnətdarlıq edib və bu məqsədlə videomüraciət yayıb.

Virtualaz.org

Xəbərlər