2123
Bu gün 1 sentyabr — 09:36

Soçidə təyyarə qəzası baş verdi, “Boeing” çaya düşdü

Ötən gecə Rusiyanın Soçi şəhərində təyyarə qəzası baş verib. Virtualaz.org Rusiya KİV-lərinə istinadən xəbər verir ki, “Utair” hava yolları şirkətinə məxsus olan və Moskvadan uçan “Boeing 737” sərnişin təyyarəsi Soçi aeroportunun uçuş-enmə zolağından çıxaraq yaxınlıqdakı çay yatağına düşüb. Nəticədə laynerin şassi dayaqları və qanadı sınıb, sol mühərrikində yanğın başlayıb.

Təyyarənin göyərtəsində 164 sərnişin və 6 heyət üzvü olub. Cəmi 18 nəfərin, o cümlədən 3 azyaşlı uşağın xəsarət aldığı bildirilir. Soçi aeroportunun bir əməkdaşı sərnişinləri xilas edərkən ürək tutmasından ölüb.

Yanğınsöndürənlər təyyarədə yanğını söndürüblər, sərnişinlər evakuasiya olunub. Aviaşirkət qəzanın səbəblərinin araşdırıldığını bildirir. İlkin ehtimallara görə qəzaya səbəb pis hava şəraiti olub. Belə ki, güclü leysan səbəbindən heyət təyyarəni birinci dövrədə endirə bilməyib. İkinci dövrədən sonra təyyarəni endirmək mümkün olsa da uçuş-enmə zolağı sürüşkən olduğuna görə layner sürüşərək zolaqdan çıxıb, Mzımta çayının yatağına düşüb. İnsidentlə bağlı cinayət işi qaldırılıb.

Hazıda Soçi aerportu rayonunda hava şəraitinin mürəkkəb olduğu, leysan yağdığı və tez-tez şimşək çaxdığı bildirilir.

virtualaz.org

Xəbərlər