190
Aktual 28 Sentyabr 2021, 14:09

Keçmiş səfir Robert Sekuta ABŞ-ı Azərbaycan və Ermənistanla daha fəal işləməyə çağırır

"ABŞ hər iki ölkədə liderlərin sülh, əmin-amanlıq və davamlı təhlükəsizlik haqqında razılığa gəlməsi məqsədi ilə əlverişli mühit yaratmaq üçün Bakı və İrəvanla münasibətdə öz nüfuzundan istifadə etməlidir".

Bunu "Xəzər Siyasət Mərkəzi"nin Məşvərət Şurasının üzvü, ABŞ-nın Azərbaycandakı keçmiş səfiri Robert Sekuta "Amerika Azərbaycanla Ermənistan arasındakı qeyri-sabit sülhü möhkəmləndirə bilər" adlı məqaləsində bildirib.

Onun sözlərinə görə, onilliklərlə davam edən münaqişələr, qorxu və nifrət hissi çoxlu sayda ermənilərin və azərbaycanlıların nəinki bir-birinə etimad göstərməsinə, hətta bir-birini tanımasına mane olur: "Bu, Azərbaycan və Ermənistan hökumətlərinin sülh müqaviləsinə riayət etməsi və qarşılıqlı əlaqələr qurması üçün imkanlarını məhdudlaşdırır. ABŞ səciyyəvi məsələləri yoxlamaq və onların həlli üçün mümkün yanaşmaları işləyib hazırlamaq məqsədilə şəxsi əlaqələrin qurulmasında Ermənistanla və Azərbaycanla birgə işləməlidir. Şimali İrlandiyadakı təcrübə və digər münaqişələr göstərir ki, bu cür proqramlar mühüm üstünlüklər yarada bilər".

Sabiq səfir qeyd edib ki, ABŞ iki ölkədə və Cənubi Qafqazda yeni nəqliyyat və kommunikasiya qovşaqlarının açılması üçün Azərbaycanla və Ermənistanla müştərək çalışmalıdır: "Bu səylər biznes imkanlarının yaradılmasına, iqtisadi inkişafa, ermənilərin və azərbaycanlıların rifah halının yaxşılaşmasına şərait yaradacaq. Bu nəqliyyat və kommunikasiya qovşaqları, Dağlıq Qarabağ münaqişəsi səbəbindən Azərbaycan və Türkiyədən təcrid edilmiş Ermənistan üçün daha zəruri olacaq. Bu layihələr Çinin Kəmər və Yol Təşəbbüsünə cavab olaraq, Qafqazı və Mərkəzi Asiyanı stimullaşdıracaq. Qeyd etmək lazımdır ki, ABŞ-nın bu əməliyyatlarından heç biri irihəcmli xərclər və ya resurslar tələb edilmir. Bunun üçün yalnız azacıq təşəbbüs və səy tələb olunur.

Bunun nəticəsi isə əhəmiyyətli olacaq. ABŞ-nın ötən baharda həyata keçirdiyi əməliyyatlar bu məsələni dəstəkləyir. Milli Təhlükəsizlik Müşaviri Ceyk Sallivanın telefon zəngindən sonra Avropa və Avrasiya İşləri üzrə Dövlət Departamenti Bürosunun o vaxtkı rəhbəri ilə Minsk Qrupunun həmsədrinin görüşü, Ermənistanın hərbi əsirlərinin qaytarılmasına, eləcə də Azərbaycanın ötən il Ermənistan işğalından azad etdiyi torpaqlarda basdırılmış minaların xəritələrinin Azərbaycana təqdim edilməsi üçün razılıq əldə olunmasına kömək edib. Bu təşəbbüs həm Ermənistan, həm də Azərbaycan tərəfindən müsbət qarşılanıb, Rusiya isə bunu etmək iqtidarında, yaxud arzusunda deyildi".

 

Sabiq səfir qeyd edib ki, Rusiyanın iştirakı ilə imzalanmış üçtərəfli müqavilə silahlı qüvvələrin bir-birinə atəş açmasının qarşısını ala bilmir və üstəlik, Ermənistanın Dağlıq Qarabağı və Azərbaycanın ətraf ərazilərini işğal etdiyi onilliklər ərzində artan nifrət hissi hələ də səngiməyib: "Azərbaycan onilliklər ərzində Ermənistanın işğalı altında qalmış Ağdamın və digər şəhərlərin, demək olar ki, tamamilə dağıdıldığını və əhalisinin didərgin düşdüyünü göstərir; Ermənistan isə bu yaxınlarda Beynəlxalq Ədalət Məhkəməsinə müraciət edərək, rəsmi Bakını dövlət tərəfindən maliyyələşdirilən "etnik və ya milli mənşəli ermənilərə qarşı" yönəlmiş proqramların icrasında və bununla da, Bütün növ irqi ayrı-seçkiliyin aradan qaldırılması haqqında Beynəlxalq Konvensiyanı pozmasında ittiham edir".

Xəbərlər