1339
Aktual 14 yanvar — 01:32

Trampa impiçment elan etdilər

ABŞ Konqresinin Nümayəndələr Palatası ölkə Prezidenti Donald Trampın impiçmentinə səs verib.

Virtualaz.org TASS-a istinadən bildirir ki, səsvermə hələ davam edir, lakin təşəbbüs artıq təsdiqlənməsi üçün lazımi sayda səs qazanıb.

İmpiçment bir maddə üzrə elan edilib - qiyama təhriketmə. Qətnamədə deyilir ki, Trampın hərəkətləri Konstitusiyanın prezidentin impiçmentinə gətirib çıxara bilən "ağır cinayətlər və səhv hərəkətlər" ifadəsinə uyğundur.

İndi ittiham aktı prosedurun məhkəməyə çevriləcəyi Senata təqdim edilməlidir. Lakin qanunverici orqanın yuxarı palatasının qrafikinə görə, Senat Trampın impiçment məsələsini səlahiyyətlərinin müddəti bitdikdən sonra həll edə bilər: Senat yanvarın 19-na qədər səsvermə tələb edən hər hansı ciddi mövzunu müzakirə etmək üçün toplaşmayacaq.

**01:18

ABŞ Konqresinin Nümayəndələr Palatası Prezident Donald Trampın impiçmenti üzrə səsverməyə başlayıb.

“RİA Novosti” xatırladır ki, Konqres üzvlərinin müzakirəsinə bir maddə çıxarılıb – "qiyama təhriketmə". Sənəd Prezidentə impiçment elan etməyi və onun gələcəkdə istənilən seçkili vəzifəni tutmasının qadağan olunmasını tələb edir. Maddədə həmçinin "ağır cinayətlər və hərəkətlər" törədilməsinə dair ittiham ifadəsi də yer alıb.

Məsələ bundan sonra Senatın müzakirəsinə çıxarılacaq. Ancaq, artıq xəbər verdiyimiz kimi, Senat yeni prezident Co Baydenin inaqurasiyasından bir gün əvvəl tətilə çıxacaq. Buna görə də proses Trampın səlahiyyətlərinin başa çatmasıma qədər tam yekunlaşmayacaq.

**23:12(13.01.2021)

Respublikaçılar Partiyasının Senatdakı lideri Mitç Makkonnell Co Baydenin andiçmə mərasimindən əvvəl Donald Trampın impiçmenti məsələsini nəzərdən keçirmək üçün Konqresin yuxarı palatasını çağırmaqdan imtina edib.

Bu barədə “Washington Post” nəşri məlumat yayıb.

Nəşr Makkonnelin nümayəndələrinə istinadən bildirib ki, o, "cümə günü və ümumiyyətlə 19 yanvara qədər" yuxarı palatanın üzvlərini yığmaqdan imtina edib.

Yanvarın 19-da, Co Baydenin vəzifə səlahiyyətinin icrasına başlamasından bir gün əvvəl isə Senat tətilə gedəcək.

Ekspertlər deyirlər ki, əgər yazılanlar düzdürsə, demokratların D.Trampı səlahiyyət müddəti bitmədən vəzifəsindən kənarlaşdırmaq planı reallaşmayacaq.

**22:10

ABŞ Konqresinin Nümayəndələr Palatasında Prezident Donald Trampın impiçmenti məsələsinə baxılır.

Virtualaz.org Rusiya KİV-inə istinadən bildirir ki, bir saat ərzində konqresmenlər Prezidentin vəzifəsində kənarlaşdırılması barədə debatların ardıcıllıq qaydasını müəyyən edəcək, daha sonra impiçmentlə bağlı iki saat müzakirə aparacaqlar.

Sonra Konqres üzvləri impiçment haqqında qətnaməyə səs verəcəklər. Sənəddə bir ittiham maddəsi var: qiyama təhrikçilik.

Qeyd edək ki, hazırda Nümayəndələr Palatasında Demokratlar üstünlük təşkil edir.

Xəbərlər