387
Aktual 11 sentyabr — 20:48

Altay Həsənov Bakıda keçiriləcək dünya çempionatı haqda

Azərbaycan bədii gimnastika üzrə 37-ci dünya çempionatının keçirilməsinə tam hazırdır.

Virtualaz.org bildirir ki, bunu Azərbaycan Gimnastika Federasiyasının (AGF) vitse-prezidenti Altay Həsənov deyib.

A.Həsənov bildirib ki, sentyabrın 16-dan 22-nə kimi Bakıda bədii gimnastika üzrə 37-ci dünya çempionatı keçiriləcək: “Yarışa ciddi hazırlıq gedir. İnanırıq ki, hər şey yüksək səviyyədə olacaq. Bədii gimnastika üzrə dünya çempionatı Azərbaycanda ilk dəfə 2005-ci ildə keçirilib. Bu, Olimpiya idman növləri üzrə Azərbaycanda keçirilən ilk vacib idman yarışı idi. O vaxtdan ölkədə çox sayda Avropa çempionatları, dünya kuboku yarışları keçirilib və biz müəyyən təcrübə toplamışıq”.

O vurğulayıb ki, onlarla ölkənin iştirak edəcəyi bu dünya çempionatına böyük maraq var: “Çempionatda 61 ölkə iştirak edir. İnanıram ki, yarışları izləyən tamaşaçılar bizim komandaya dəstək olacaq. Ona görə də media vasitəsilə hamını bu gözəl idman bayramına dəvət edirəm. Əsas hədəfimiz lisenziya qazanmaqdır. Məlum olduğu kimi, bu dünya çempionatı Tokioda keçiriləcək Olimpiya oyunlarına lisenziya qazanmaq imkanı verir. Bu bizim üçün çox vacibdir”.

A.Həsənov xüsusilə vurğulayıb ki, biletlərin 45 faizi xaricdən alınıb.

Qeyd edək ki, ilkin qeydiyyat siyahısına əsasən yarışda çıxış edəcək 300-dən çox gimnast Olimpiadaya yeni namizəd olmaq üçün yarışacaq. Fərdi proqramda çoxnövçülük üzrə ilk 16-lıqda yer alan gimnastlar (bir ölkədən maksimum 2 gimnast olmaqla) lisenziya əldə etmiş olacaqlar. Qrup hərəkətləri komandalarına gəldikdə isə, ötən ilin Dünya Çempionatının nəticələrinə əsasən Bolqarıstan, Rusiya və İtaliya artıq lisenziyanı təmin ediblər. Bu ilin çempionatında çoxnövçülük xalları üzrə daha 5 ən yaxşı komanda Tokioya vəsiqə qazanacaq.

Xəbərlər