3489
Aktual 11 sentyabr — 23:43

“Ara, bircə Xaçaturovu yox, KTMT rəhbəridir, tam biabır olarıq...”

Ermənistanda iki xüsusi xidmət orqanının-Milli Təhlükəsizlik Xidmətinin rəhbəri Artur Vanetsyanla Xüsusi İstintaq Komitəsinin rəhbəri Sasun Xaçaturyan arasında telefon danışığının internetdə yayılması Nikol Paşinyanın hökumətini ciddi sarsıdıb. Virtualaz.org xəbər verir ki, hərçənd Paşinyan baş verənləri “şantaj” adlandırır və geri çəkilməyəcəklərini bildirir. Amma səs yazısı sübut edir ki, Ermənistanda keçmiş hakimiyyətin nümayəndələrinə qarşı aparılan istintaq siyasi sifarişə əsaslanır. Xüsusən KTMT baş katibi Yuri Xaçaturovun barəsində həbs qətimkan tədbirinin seçilməsinin göstərişini şəxsən Paşinyan özü verir.

Telefon danışığının kim, yaxud hansı ölkə tərəfindən qeydə alınıb sızdırıldığı hazırda qızın müzakirə mövzusudur. Və əksər ekspertlər, sosial şəbəkə istifadəçiləri bunu Rusiya Baş Kəşfiyyat İdarəsinin (QRU) işi hesab edirlər. Hərçənd səs yazısının yayılmasını ABŞ kəşfiyyatının işi hesab edənlər də var.

Məlum olur ki, səz yazısı hələ avqustun 5-də həmin gün açılmış YouTube kanalında yerləşdirilib, lakin fayl baş nazir Nikol Paşinyanın Moskvaya səfərindən sonra aktivləşdirilib. Bu isə təsadüfi ola bilməz. Hansı ki, baş verənlər Paşinyanın Moskvada Putinlə danışıqlarının xeyli gərgin keçdiyinə dair saytımızın əldə etdiyi məlumatları dolayısıyla təsdiqləyir.

Artur Vanetsyan keçirdiyi mətbuat konfransında deyib ki, telefon danışığını 99.99 faiz ehtimalla onun başçılıq etdiyi strukturda yazmayıblar. Amma Vanetsyan hansısa xarici dövlətə də eyham vurmayıb, bunun keçmiş hakimiyyət nümayəndələri tərəfindən edilməsi ehtimalına daha çox üstünlük verdiyini nümayiş etdirib.

Telefon danışığına əsasən Vanetsyan müstəntiqlərin KTMT baş katibi Yuri Xaçaturovun barəsində həbs qətimkan tədbiri seçməyə hazırlaşdığını eşidəndə Sasun Xaçaturova deyir: “Brat, bircə bu Xaçaturovu yox, KTMT rəhbəridir, tam biabır olarıq”. Vanetsyan Xaçaturovun məsələsinin “siyasi problem” olduğunu deyir və Rusiya ilə hansısa “razılaşmadan” danışır.

Xaçaturyan isə məsələni baş nazirlə müzakirə etməyi ona məsləhət bilir: “Görürsən ki, mən artıq həbs barədə elan etmişəm”.

“Yaxşı, mən ona elə indi zəng edərəm”-Vanetsyan Paşinyana zəng vuracağını deyir. Habelə bildirir ki, keçmiş prezident Robert Köçəryanın işinə baxan hakim bir az qorxub. Amma Xüsusi İstintaq Komitəsinin rəhbər hakimə Köçəryanın həbs edilməli olduğunu tapşırdığını deyir: “Ona dedim ki, məni maraqlandırmır sən bunu istəyirsən ya yox, həbs barədə qərar çıxarmalısa”.

*   *   *17:00

Ermənistanın Xüsusi İstintaq Xidmətinin rəhbəri Sasun Xaçaturyan onunla Milli Təhlükəsizlik Xidmətinin rəhbəri Artur Vanetsyan arasında telefon danışığının dinlənilməsi, səs yazısının internetdə yayılması ilə bağlı təcili mətbuat konfransı keçirib.

Virtualaz.org erməni KİV-lərinə istinadən xəbər verir ki, Xaçaturyan telefon danışığının yayılmasını 2008-ci il 1 mart hadisələrinə dair istintaqa mane olmaq cəhdi adlandırıb. Deyib ki, şəxsin icazəsi olmadan onun barəsində məlumatların toplanması, yayılması cinayətdir.

“Biz xalqa oğurlanmış milyardları qaytarmağa çalışırıq, qatilləri və onların sponsorlarını məsuliyyətə cəlb etmək istəyirik. Onlar nə edə bilər? Bu, bizi dayandırmağa yönəlmiş miskin cəhddir, amma inanın ki, biz dayanan deyilik və öz işimizi görəcəyik”-Sasun Xaçaturyan bildirib.

Xüsusi İstintaq Komitəsinin rəhbəri təsdiq edib ki, baş nazir Paşinyanı KTMT baş katibi Yuri Xaçaturovun həbsi barədə məlumatlandırıb. “Baş nazir dəfələrlə deyib ki, hansısa şəxsin təsqirləndirilən qismində istintaqa cəlb edilməsinə siyasi əngəl ola bilməz. Bu planda bəli, mən cənab baş naziri Xaçaturovun və digərlərinin barəsində qətimkan tədbirinin seçilməsi barədə məlumatlandırmışam”-o deyib.

Bununla belə səs yazısında Xaçaturovun həbsi barədə siyasi sifariş aydın eşidilir.

*   *  *16:48

Ermənistan Milli Təhlükəsizlik Xidmətinin direktoru və Xüsusi İstintaq Xidmətinin rəhbərinin sensasion səs yazısı yayılıb.

Virtualaz.org yerli KİV-ə istinadən bildirir ki, səs yazısı Ermənistan Xüsusi İstintaq Xidmətinin rəhbəri Sasun Xaçatryan və Milli Təhlükəsizlik Xidmətinin direktoru Artur Vanetsyan arasında Ermənistanın 2-ci prezidenti Robert Koçaryan və KTMT-nın baş katibi Yuri Xaçaturovun həbsi barədə danışıqlardan ibarətdir.

Vanetsyan ona hakimlə söhbəti haqda danışır, bildirir ki, artıq Koçaryanın həbsi ilə bağlı təlimat verilib. Sonra Xaçaturova keçir. Deyir ki, KTMT-nın baş katibinə heç bir halda toxunmaq olmaz, çünki Rusiya ilə münasibətləri korlamaq təhlükəsi var.

Ermənistanın baş naziri Nikol Paşinyan "Facebook" sosial şəbəkəsində canlı yayımı zamanı Ermənistanın Xüsusi Istintaq Xidmətinin rəhbəri Sasun Xaçatryan və Milli Təhlükəsizlik Xidmətinin direktoru Artur Vanetsyan arasında Ermənistanın 2-ci prezidenti Robert Koçaryan və KTMT-nin baş katibi Yuri Xaçaturovun həbsi barədə səs yazısını təsdiqləyib.

Paşinyan bildirib ki, Milli Təhlükəsizlik Xidmətinin direktoru Artur Vanetsyanı yanına çağıraraq mətbuat üçün açıqlama verməsinə dair göstəriş verib.

"Biz bu izahlara hələ qayıdacağıq. İndi mən başqa şey demək istəyirəm. Bunu kim və niyə etdi? Hansı siyasi hədəflə?", - Paşinyan bildirib.

Onun sözlərinə görə, həmin şəxslərin danışığı siyasi sabotaj məqsədi ilə dinlənilə bilərdi.

"1 martda insanların qətlində günahkar olanların hamısı məhkəmə qarşısında cavab verəcək. Xalqdan oğurladıqlarının hamısını xalqa qaytaracaqlar - Robert Koçaryan, Serj Sarkisyan, Ovik Abramyan, Manvel Qriqoryan, Taron Markaryan, Qaqik Xaçatryan… Müxtəlif kalibrli məmurlar bunu hiss edirlər və bilirlər ki, bu vaxt gəlir. Və onlar buna mane olmaq üçün hər cür vasitəyə əl atırlar", - Paşinyan bildirib.

Virtualaz.org

Xəbərlər